【Emily】陳皓桓旺角睹執法 「排檔呻搞死經濟」

【明報專訊】政府希望搞好經濟，但就不時聽到社會要求放寬小販管理制度、食肆要求申請牌照時可「拆牆鬆綁」嘅聲音。前民陣召集人陳皓桓（Figo）噚日去到旺角花園街，聽到有一肚火嘅檔主忍唔住大鬧政府：「政府搞死經濟，係咪仲想搞死人啊？」

Figo提到，喺移民、市民北上、結業潮下，樓市股市跌但租金升，但政府又不停出招：抄牌、捉排檔佔位、追稅、加煙稅、加重各樣罰款，搞到愈嚟愈多人不滿。噚日下午佢話喺花園街親眼見到政府部門執法，逐個逐個排檔度尺，幾乎全部檔口都要「縮水」，搞到班檔主好無奈，事關佢哋確實佔多咗位。

排檔嘅擺放範圍有限制，以確保消防車可以通過兩邊排檔之間嘅通道。Figo話檔主好無奈，忍唔住隔空鬧政府：「你要畀幾多貨櫃車過啊？政府搞死經濟，係咪仲想搞死人啊？已經愈嚟愈少生意，仲要呢樣嗰樣！」

Figo慨嘆，唔係話亂泊車、排檔佔多咗位係做得啱，反問樣樣捉到咁緊，「又係咪真係有助管治呢？係咪完全無得平衡吓呢？又係咪幫到小市民同經濟呢？」