【Emily】改組草案恢復辯論前夕 最後55人會議 中大校董唔齊人

【明報專訊】改革中大校董會嘅《2023年香港中文大學（修訂）條例草案》今日喺立法會恢復二讀及三讀，若果獲通過，改革之一係校董會將由55人減至34人。噚日正正係現屆校董會開會嘅日子，亦相信係最後一次55人架構嘅校董會開會，出席嘅校董都打上中大領呔或領巾大合照，不過始終唔齊人，相中只見35人。

通過後盡快開「過渡校董會」 最少12人

有份提出草案嘅民建聯立法會議員劉國勳噚晚喺facebook上載大合照，話相信校董會各成員都願意令中大變得更好，未來亦會團結一致，畀中大繼續向前行。會議歷時約兩個半鐘，劉國勳同Emily講，會議傾到中大校務，亦交代咗草案通過後嘅安排。佢話草案通過後，預計最快10日刊憲，之後會盡快召開一次最少12人嘅「過渡校董會」，商討改組方案嘅細節安排，但暫時未知要幾耐完成重組。

曾發起聯署反對草案嘅校董香樹輝會後同傳媒講，自己係最後一次以校董身分開會，佢無任何遺憾，但就話草案係強加於中大身上，校董會無正式討論或通過，最後都無共識，喺咁嘅情况下通過草案，就令人覺得有啲可惜。