【Emily】考察南丫蘇心湖 葉劉倡搞水上活動中心

【明報專訊】政府有意重啟前南丫石礦場發展研究，2012年建議發展低密度住宅同旅遊設施，發展有亮點嘅康樂用途，同唔太需要往返市區嘅產業。行會召集人兼新民黨主席葉劉淑儀同黨友陳家珮等，前日就同副財政司長黃偉綸及發展局長甯漢豪、躍動港島南辦事處總監區潔英等多人去考察。葉太引述黃偉綸話見到人工湖蘇心湖景色優美，好似「港版九寨溝」咁。黃偉綸喺社交網站話，對未來發展方向會採取開放態度，希望善用呢處美麗嘅地方。

前南丫石礦場位於索罟灣北岸，現為基督教青年會（YMCA）戶外及環保活動中心，主要用作野外活動同環保學習。葉太同官員由中環碼頭出發搭船到索罟灣，之後坐船到前石礦場，由營地行十幾分鐘，就到佔地約5公頃嘅人工湖蘇心湖。

引黃偉綸話似「港版九寨溝」

葉太參觀完話，香港需要更多新興旅遊景點，認為如果交通配套齊全，唔少中產都會樂意喺附近居住。佢舉例話，營地碼頭可擴建停泊較大型船隻或遊艇，蘇心湖可以用嚟做水上活動中心，市民亦可於南丫島行山食海鮮，唔好浪費珍貴土地資源。