【Emily】旅局迎萬聖節 金鐘銅鑼灣站南瓜處處

【明報專訊】今個月底就到萬聖節，旅發局噚日開始推出「哈囉威香港」（”Hallo” Hong Kong Halloween）推廣活動，其中以南瓜為主題嘅裝飾噚日起遍佈港鐵金鐘站及銅鑼灣站大堂、月台地面、樓梯、扶手電梯等；中環站、灣仔站及尖沙嘴站亦會添上節慶裝飾。開篷巴士、天星小輪及鴨靈號中式帆船會披上萬聖節主題彩衣。

旅客中心有Trick-or-Treat派糖

旅發局並安排活動，畀親臨機場、高鐵西九龍站及尖沙嘴天星碼頭旅客諮詢中心嘅旅客大玩Trick-or-Treat，贈糖果。旅發局總幹事程鼎一話，香港係萬聖節氣氛最濃厚嘅亞洲城市之一，因此趁政府推出「香港夜繽紛」喺不同角落「張燈結綵」，希望進一步推高節日氣氛。

另外，上周為期3日嘅海濱「夜繽紛」活動，都吸引唔少人參與，其中灣仔海濱首次舉行「是．夜．灣仔」電影放映及城市漫遊活動，發展局話有別於夜市形式，但同樣鼓勵大家晚上多出嚟走走，欣賞夜間嘅灣仔，呢項活動獲市民正面評價，估計整個周末吸引逾1000人參加。