【Emily】訪越提「海防道」 林世雄：證與港關係久

【明報專訊】正喺越南訪問嘅運輸及物流局長林世雄向當地商界推介香港時，少不免講吓兩地關係。佢喺一個午餐會致辭時就提到，尖沙嘴海防道同河內道以越南城市命名，兩條街自1900年代已經存在至今，證明香港同越南商貿物流關係由來已久。

海防道同河內道係香港少數唔係以英國或中國題材命名嘅街道，根據發展局資料，海防道同旁邊嘅彌敦道係1860年代尖沙嘴最先建造嘅兩條街。局方資料亦提到，自1920年代起，有印度商人喺附近賣印度貨品畀附近軍營嘅英國軍人。Emily再翻查資料，以越南地方命名嘅香港街道仲有西貢街同東京街，深水埗嘅大南街就有指同越南峴港有淵源。

林世雄此行仲同當地物流及工商組織會面，又參觀咗一個智慧物流園。佢喺午餐會致辭話，香港加強同「一帶一路」沿線地區合作，越南作為亞投行創始成員，相信兩地貿易同物流有好大潛力。