【Emily】喵坊建廠籌款宴 梁安琪贊助

【明報專訊】全港首間紙包飲品盒回收廠「Mil Mill喵坊」位於元朗廠房不獲科學園續租，已於上月底遷出，搬到粉嶺坪輋新廠房。喵坊創辦人葉文琪話，舊廠房好多機器搬唔到去新廠房，新廠房要重新添置機器，又要接駁水電等，全部都要錢，總成本估計達1000萬元。不過搬廠一事獲唔少市民支持，其中前電台節目主持、東區前區議員梁安琪於下周四（19日）贊助一場建廠晚宴，所有收入作建廠用途。

葉文琪話感謝梁安琪一番心意，贊助晚宴全數開支，當晚會喺火炭一酒樓筵開10圍，每圍12人，每人收費500元，估計籌得約6萬，當晚佢會分享喵坊下一步發展；所有收入全數用作起新廠房，本月底（29日）仲會喺灣仔舉辦二手市集義賣日，籌到嘅錢亦會用嚟資助喵坊建廠。