【Emily】「飛人」蘇炳添培僑分享 即場教跳遠 17校400師生齊參與

【明報專訊】中國國家田徑隊代表「蘇神」蘇炳添噚日到培僑中學同超過400名師生分享，仲即場指導學生立定跳遠技巧，一向鍾意運動嘅立法會議員鄭泳舜都有出席。蘇炳添分享提到，前年喺東京奧運100米準決賽跑出9秒83嘅新亞洲紀錄後，心情有啲失控，原因係佢2019年受傷，2020年又因新冠疫情而成個賽季無比賽等因素，最終如願，心情特別激動。

傷患疫情夾擊 東奧破紀錄心情「失控」

蘇炳添仲話，去年比賽成績雖然唔太理想，但?家34歲仍然繼續堅持，希望明年35歲仲能夠出戰巴黎奧運。

主辦分享會嘅培僑中學校長伍煥杰同Emily講，今次係透過「廣東省體育基金會」嘅「與冠軍同行」計劃邀請蘇炳添，主要希望學生更注重運動同身心發展，又話今次機會難得，所以邀請埋其他學校師生參與，連同培僑一共有17間學校嘅師生參與。

伍校長話，蘇炳添先分享做運動員嘅心路歷程，之後接受學生提問，並邀請近10名學生上台，指導佢哋立定跳遠技巧，最後喺校園種咗一棵「冠軍樹」同打手印送畀學校，結果原定一個鐘嘅活動超時至近兩個鐘；不過由於蘇炳添喺活動後要趕返廣州，時間有限下，好多同學都未能同「蘇神」合照或攞簽名。