【Emily】鄉議局就職 特首盼團結社區撐北都

【明報專訊】新界鄉議局噚日舉行第36屆就職典禮，特首李家超、中聯辦副主任何靖到場主禮。李家超致辭提到，期待鄉議局喺三方面繼續同政府合作，其中為團結社區，指新一屆區議會明年1月就任，而各鄉事委員會主席繼續擔任區議會當然議員，希望佢哋繼續做政府同新界居民之間嘅溝通橋樑，並積極配合政府更有效地策劃及推展地區服務。

李家超又期望，鄉議局積極支持北部都會區發展，同埋弘揚以愛國愛港為核心、同一國兩制方針相適應嘅主流價值觀。

鄉議局主席劉業強亦提到北部都會區，話北環線同十一號幹線等大型基建項目相繼落實，會為新界鄉郊帶來前所未有嘅發展機遇；港深兩地將有更多互聯互通，特區政府必須加強發展口岸經濟帶；又以新田科技城為例，建議政府參考內地嘅舊城改造做法，重建該處7條鄉村。劉業強又話，年底嘅區議會選舉係「完善選舉制度」下嘅「最後一里路」，鄉議局會呼籲新界原居民務必履行公民責任，踴躍投票。