【Emily】fb帳號冒一哥蕭澤頤 網罪科調查

【明報專訊】facebook不時出現假帳號，今次到警隊「一哥」蕭澤頤中招。警方噚日呼籲市民提高警覺，慎防一個以「Raymond Siu」名稱同警務處長圖片作為頭像而設立嘅偽冒fb帳號，強調必會嚴肅跟進事件，已立案調查，由網絡安全及科技罪案調查科跟進。Emily噚日傍晚發現個帳號已經消失咗。

偽冒帳號嘅封面照片仲用咗前年6月25日蕭澤頤、李家超、鄧炳強同時任特首林鄭月娥嘅合照，當日3人分別獲中央任命為警務處長、政務司長及保安局長，喺林太監誓下宣誓就職。

警方發言人澄清，蕭澤頤未有設立上述個人fb帳號，懷疑有人冒充警務處長之名，企圖作出不法行為，呼籲市民提防。發言人重申，互聯網世界唔係無法可依嘅虛擬世界，根據香港法例，大部分喺現實世界用嚟防止罪行嘅法例，都適用於互聯網世界，市民必須合法同負責任地使用互聯網。