【Emily】英文說好中國故事 胡曉明搞AI論壇

【明報專訊】全國人大代表胡曉明同幾位政商界朋友，3年前成立咗組織「Friday Culture」，係一個英文傳訊平台，以文章、短片等方式向外界介紹中國及香港文化，「說好中國故事」。Friday Culture過去兩年都有辦大型論壇，今年再接再厲，會喺11月2日舉辦，主旨係探討AI及科技對生活嘅影響。

胡曉明話，組織嘅受眾係英語世界嘅人，想以輕鬆幽默手法傳達信息，因為歐美媒體不時「妖魔化」中國，唔了解中國人思想。不過，佢話發現平台嘅內容喺內地都有一定數量嘅人瀏覽，可能係呢啲人對用英文講中國文化感興趣，又或者內地人想乘機學英文。

講番今年嘅論壇，特首李家超會透過視像參與，中聯辦及外交部特派員公署亦會派高層參加。胡曉明話，早排喺一個場合遇見美國哥倫比亞大學著名學者Jeffrey D.Sachs教授，於是邀請對方參加，對方二話不說答應，屆時會透過網上參加研討。