【Emily】冒險樂園：彩虹圖案大過代幣

【明報專訊】美國冒險樂園屯門華都商場分店近日陷入「掟彩虹」紛爭，被質疑代幣大過條彩虹色帶，難以中獎。美國冒險樂園噚日回覆Emily，強調幸運彩虹每個圖案都大過代幣，「對於顧客作出的不實指控，本公司深表遺憾」。海關同Emily講已接獲相關舉報，?家跟進緊，如果發現違反《商品說明條例》嘅情况，會採取適當執法行動。

美國冒險樂園解釋，事發時分店經理按照公司指引同判獎準則，到幸運彩虹攤位判獎，見到代幣的確有同黑界重疊，於是就同番事主講冇中獎。經理之後仲用手機以俯視判獎角度影低代幣相片，向事主展示同進一步講解，不過事主仍認為代幣中獎，自行報警處理。

園方話警員到場後，分店經理擺咗一個中獎示範同事主投出嘅代幣做對比，同時再用手機俯拍中獎示範畀事主睇番，經過再三講解後，最終雙方未能達成共識，警方就建議事主從其他途徑跟進。美國冒險樂園強調，幸運彩虹唔存在代幣大過彩虹圖案嘅情况，指事主指控不實。