【Emily】港隊歸來 周六政總慶祝

【明報專訊】杭州亞運前日結束，港隊奪得破紀錄嘅53面獎牌，特區政府噚日喺機場舉行儀式迎接港隊返港，傍晚7點，約70個港隊成員步出接機大堂，部分人掛起獎牌喺心口上台，同政務司副司長卓永興、文體旅局長楊潤雄、康文署長劉明光等人合照同交流，另亦有唔少港隊成員嘅家屬去接機，喺歡迎儀式過後一家人合照。

卓永興楊潤雄接機

卓永興事後除咗讚賞奪獎牌嘅運動員，之前喺高官足球隊守龍門嘅佢，特別提到香港男子足球隊歷史性殺入亞運四強，話球員鬥志同拼搏獲得好多市民認同。卓永興話十分期待各運動員喺日後嘅大型體育賽事再放異彩。

楊潤雄噚日喺facebook出post話，本周六（14日）會喺政府總部搞亞運慶祝會，由特首李家超主禮。佢話港隊獲獎數目同獲獎運動項目都係歷屆之冠，成績令人鼓舞，感謝所有參與亞運嘅運動員、教練同醫療團隊，又話港協暨奧委會、體院及各體育總會喺推動本港體育發展功不可沒。