【Emily】100煤氣調壓站智能化 年慳6000度電

【明報專訊】創新科技係大勢所趨，連煤氣調壓站都要智能化。煤氣公司話，喺各區100個調壓站引入物聯網，升級為「智能調壓站」，引入太陽能供電系統，為智能系統提供可再生電力，直頭「自給自足」。公司計劃出年將智能調壓站數量增加一倍至200個，再用太陽能供電，預計每年可減少使用超過6000度電，減少約3100多公斤碳排放，相等於種植約250棵樹。

智能調壓站有幾犀利？負責智能調壓站項目嘅煤氣公司配氣操作部高級工程師趙蔚婷話，調壓站採用新型窄帶物聯網（NB-IoT）技術作為無線數據傳輸，低功耗、低成本，而且可以遠距離通訊，唔使工作人員到現場檢查之餘，仲可以24小時監察調壓站運作。至於太陽能供電系統，趙蔚婷就話，「我哋挑選咗較高效能嘅太陽能板，確保可以承受10號風球風力，就算早前經歷咗超強颱風『蘇拉』吹襲，也絲毫無損」。