【Emily】8號生日掛8號波 吸風台長：關我事

【明報專訊】颱風「小犬」襲港，天文台噚日晏晝改發8號風球，撞正任內先後面對多個10號風球、有「吸風台長」之稱嘅天文台前台長岑智明生日。岑智明喺社交平台發文，講笑話：「吸風台長重出江湖：今日8號、又係我生日、一定關我事，哈哈哈。」

帖文出咗幾個鐘已吸引逾近千個「讚」同「笑」，有300幾個留言。唔少人祝岑智明生日快樂，有網民話：「你几（幾）有飛屎（面子），隻小狗仔都要同你祝生日快樂唄！旺旺旺！」岑就覆佢「旺旺旺」。天文台前助理台長梁榮武都有留言，話自己仲勁，10年前11月8日生日時，咁啱喺菲律賓追風，感受到世紀颱風「海燕」嘅威力。

另一前台長、出名唔開冷氣嘅林超英，就乘機宣傳樂施會搞嘅氣候變化攝影展活動，話氣候變化唔係遙不可及嘅事，而是對脆弱群體實實在在嘅衝擊。