【Emily】民建聯晚宴 李慧琼金嗓子籌得300萬

【明報專訊】民建聯原定上月初搞籌款晚宴，但遇正香港先後經歷超強颱風「蘇拉」同歷時最長嘅「黑雨」，各界忙於善後，於是晚宴押後至噚晚舉行。據Emily了解，晚宴一如以往有唱歌同拍賣籌款嘅環節，其中剛卸任黨主席嘅李慧琼「開金口」與一班長者合唱，籌得約300萬元；會務顧問譚耀宗則獨唱《獅子山下》，獲監委會主席盧文端上台獻花，籌得逾200萬元。

譚耀宗一首《獅子山下》200萬

民建聯噚晚喺灣仔會展舉行晚宴，筵開80幾席，超過900人赴會，特首李家超、中聯辦主任鄭雁雄、外交部駐港特派員公署署理特派員李永勝、駐港國安公署局長鄧建偉及多名司局長都有到場，部分人逗留一陣後離開。晚宴改期，其間民建聯亦剛好完成換屆，由陳克勤接替李慧琼擔任黨主席，陳恒鑌同葛珮帆則加入領導層做副主席。

晚宴以「感恩有你、同開新篇」為主題，陳克勤致辭時先向中央表示感恩，話中央一直都係香港發展嘅堅強後盾；又話感恩特首及其團隊積極作為、敢於擔當等；最後感恩有香港市民對民建聯嘅支持。