【Emily】話公路單車「輸在起跑線」  田北辰倡欣澳建場

【明報專訊】杭州亞運高潮迭起，港隊公路單車運動員楊倩玉前日勇奪金牌，立法會議員田北辰話，港隊多年都冇合適訓練場地，係「輸在起跑線」。佢建議喺欣澳填海地興建多用途道路活動場地，包括做賽車場、公路單車同長跑訓練，只要提供硬件，每年都可以有活動吸引人流，唔似主題公園要不斷畀錢更新。田北辰仲話，有同單車隊總教練沈金康好詳細傾過，佢都好支持呢個建議。

撐港隊 馬場聽日下晝免費開放

另一矚目賽事係男足日前歷史性打入4強，刷新歷來最佳成績。雖然不敵日本未能躋身決賽，但仲可以喺周六同烏茲別克爭銅牌。香港賽馬會為咗支持港足，將會喺聽日下晝免費開放跑馬地馬場，今次入場仲講明不設年齡限制！

球賽預定開賽時間係下晝4點正，馬場會預早一個鐘開放，直至晚上7點。場內仲設有攤位售賣小食同飲品。由於容納人數有限，座位先到先得，額滿即止。另外，馬會轄下全港88間場外投注處都會直播亞運賽事。