【Emily】律師會訪英 邀同行來港睇聆訊

【明報專訊】英國日前舉辦法律年度開啟典禮，香港兩個律師會代表都有去英國參與。律師會會長陳澤銘噚日向傳媒總結行程時話，有鼓勵英國法律界人士同商界親身嚟香港，參與法律聆訊或旁聽聆訊，形容親身睇「好過我講好多句」或者只睇當地傳媒報道。

據Emily了解，律師會同大律師公會都有邀請英國律師會同大律師公會回訪香港，嚟出年年頭嘅法律年度開啟典禮。陳澤銘就話，香港距離除咗比較遠，部分當地法律界代表如果要嚟，都感受到啲壓力，不過都有積極邀請佢哋親身體驗吓。

英國司法大臣卓艾歷（Alex Chalk）都有舉辦活動，邀請各普通法地區法律界代表出席。陳澤銘話，有同對方短暫交流，推介香港普通法傳統，並向對方表明好有信心普通法繼續喺香港適用。