【Emily】港足4強戰 高官體育館睇波打氣

【明報專訊】杭州亞運香港足球代表隊歷史性打入亞運4強，噚晚以0比4不敵日本，多名官員、議員都關注呢場賽事，財政司正副司長陳茂波、黃偉綸同文體旅局長楊潤雄等多名官員，就到九龍公園體育館直播區與市民一齊睇波。楊潤雄形容港隊「雖敗猶榮」，喺賽事中體現港人永不言敗嘅精神。

楊潤雄：體現永不言敗精神

陳茂波、黃偉綸、楊潤雄同房屋局長何永賢、體育專員黃德森到九龍公園體育館觀賞球賽。楊潤雄賽後喺facebook話，港隊喺比賽中表現拼搏，體現港人永不言敗嘅精神，感謝球員嘅努力，並會喺銅牌戰繼續為港隊打氣。港隊將於周六出戰銅牌賽。

足總噚晚就喺銅鑼灣一間戲院舉行睇波派對，足總副主席、前民政局長徐英偉同民建聯立法會議員鄭泳舜到場，與一眾球迷觀賞賽事。多名議員如工聯會陸頌雄、新思維狄志遠、選委界陳凱欣等噚日都有睇波，其中阿狄喺臉上貼咗代表香港區旗嘅紅色同白色貼紙，為港隊打氣。