湯文亮：港人往內地消費 間接穩住港樓市

【明報專訊】雖然現在市場傳出政府考慮撤辣，但仍然有不少人話，就算政府撤辣都冇用，香港人都不熱中買香港樓，寧願留返啲錢去深圳消費，甚至在內地買樓，但大家可能唔知道，在兜兜轉轉之下，香港樓竟然間接由香港人買返。

我有一個在深圳做飲食業的老友在香港以公司股權形式轉讓買了樓，雖然唔使畀辣招印花稅，但仍然覺得很奇怪，點解老友會在香港KOL一致唱淡樓市之下買樓。老友話賺得香港人錢要在香港花多少，否則對唔住香港人，老友說話令不少港人摸不着頭腦，但我知道老友的意思。

近日報章經常提及香港人去深圳消費，使費比香港平了不少，不過，殺頭生意有人做，蝕本生意冇人做，做香港人生意的內地人一定有錢賺，當中有不少好似我老友一樣，賺得香港人的錢就會返香港消費，甚至買層樓，無形中穩住香港樓市。所以，我們應該多謝回內地消費的香港人，他們口中雖然唱淡香港，但間接支持香港樓市。

內地經商賺港人錢 回港買樓

我相信去深圳消費的香港人，發夢都想唔到在深圳賺他們錢的人竟然在香港買樓。我問老友香港樓價明顯比深圳高，又點會在香港買樓。老友話雖然樓價高一些，但買得放心，即使樓市疲弱，香港地產商亦不會要錢唔要貨的心態劈價促銷，亦不會出現爛尾樓，令到買樓的人不用擔心地產商自己的財務問題而令到買樓的人有所損失。至於樓價正常升跌，就要睇買樓人士眼光是否精準。

我突然才警覺，老友請我食飯的是米芝蓮二星餐廳。我話大家聚會食飯，不用破費。老友話賺了香港人太多錢，如果唔在香港使番多少，似乎對唔住香港人，咁樣就卻之不恭。香港人求平，深圳人求靚，老友這樣做算不算是港深版的以物易物？

紀惠集團行政總裁

[湯文亮 敢說反話]