【Emily】9點觀察 自言公司難請人「諗過停」 陳智遠：經濟差人才走 港人冇乜開心過

【明報專訊】政府喺中秋、國慶假期期間大搞「夜繽紛」活動，市民反應似乎唔錯，但不時分享對香港旅遊業等睇法嘅活現香港共同創辦人、前食衛局政治助理陳智遠（圖）噚日喺facebook話有9點觀察，其中提到中小企完全請唔到人，想復常做番生意都難；以佢公司為例，新冠疫情反而唔怕，但因為請唔到人，認真諗過不如停咗間公司休息一陣。

佢仲話，日常生活感受到經濟幾差，旅遊業復蘇又比其他城市慢，「香港好似已經無乜板斧，過埋黃金週，大家都無得再呃自己」。佢又話人才流失令香港各行業青黃不接情况嚴重，仲留喺香港嘅中產食飯見面再唔係問走唔走，「而係問幾時走」。

復蘇慢 「過埋黃金週無得呃自己」

特首李家超希望繼續吸納社會意見，但陳智遠話身邊唔少人都心灰意冷，「無心情同你出謀獻策，剩係想不問世事，你想點就點」；佢又話好多香港人都好壓抑好懨悶，「根本大家冇乜開心過」，雖然間中會見到「開心香港」字句，又唔消費都係因為見唔到前景，想留定個錢為將來應變，包括移民、送子女留學等。

總括而言，陳智遠話普羅大眾都過得「好辛苦」，對好多事好有意見，只係唔講出口。