【Emily】探稀有生物海洋地貌 虛擬深海體驗館2025落戶航天城

【明報專訊】近年唔少展覽都加入沉浸式體驗元素，務求令大家身歷其境。由K11集團與國際級娛樂科技體驗集團Falcon’s Beyond創製嘅「Vquarium™」，將會係本港首個虛擬深海探險體驗館，2025年落戶機場航天城11 SKIES。大家可以化身探險家「登上」深海考察潛水器，跟住虛擬海洋生物穿梭於奇幻水域，或深入人類難以觸及嘅深海，探索稀有生物及奇特海洋地貌，過程中除咗可以影相「打卡」留念，仲可以從中學習海洋知識及培養環保意識。

採MR技術 增互動沉浸感

體驗館分3層及不同主題區，垂直空間達13米，以營造深海空間感，並採用特效動態模擬器及混合實境技術（Mixed Reality，MR），增強互動及沉浸式體驗。

Falcon’s總部設於美國奧蘭多，業務主要係推動具知識產權（IP）專利、結合實體及數碼嘅娛樂體驗，曾合作嘅品牌包括漫威（Marvel Studio）、韓國樂天世界（Lotte World）等，項目遍及美國、迪拜、新加坡等地。