【Emily】基本法問答比賽 考埋國安知識

【明報專訊】民政及青年事務局、公民教育委員會等將舉辦新一屆「有問有答《基本法》問答比賽」，以提升公眾對憲法、《基本法》同《港區國安法》嘅認識。比賽網站有模擬題目畀大家試玩，每組各有5條題目，其中各有兩條都係同國安有關，例如問到國安法明文規定嘅4類危害國家安全罪行、國安處職責等。其餘就多數圍繞基本法，例如問到正文有幾多章、修改權屬於咩機關。

初賽已經開始接受申請，分為親子組或高小組、中學組同公開組，喺比賽網站答完20條問題後就可以遞交參賽申請，或者經郵遞或親身遞交答案同申請。每組總冠軍仲可獲得獎狀同價值6000元禮券。

總冠軍獎6000元禮券

初賽今年12月29日晚上11時59分截止後，主辦機構將以抽籤選出每個組別答啱最多問題嘅參加者出席決賽暨頒獎禮，出席者有機會參與決賽環節贏取獎品。有興趣參加市民可以瀏覽網站（www.cpce.gov.hk/basiclaw2023-24）。