【Emily】普通話朗誦賽用AI分析準確度

【明報專訊】為推動本港學生學習愛國教育主義同提升對中國傳統文化認識，民建聯同新界校長會搞咗個名為「曾憲備‧紫荊盃」嘅全港少兒普通話朗誦比賽。比賽前日（28日）舉行，最特別之處係用咗AI（人工智能）嘅評審技術，當參賽者按照應用程式嘅內容朗讀後，大會就會利用AI系統分析佢哋嘅普通話發音準確程度，並透過大數據分析參賽者嘅學習模式同困難點，提供即時反饋同指導，從而提升學生嘅普通話水平。

大數據分析困難點 即時指導

比賽組別分為6個不同年齡群組，有近3600名學生報名，參與學校超過800間。有份擔任頒獎禮主禮嘉賽嘅副政制及內地事務局長胡健民就話，自己細個時冇機會學普通話，樂見?家香港有唔少機會畀學生學習，相信佢哋多聽、多講、多體驗就可以活用普通話，同埋認識中華文化和國情。教師出身嘅立法會議員郭玲麗就認為，普通話係全球最多人使用嘅語言，亦係聯合國6種官方工作語言之一，建議政府應完善普通話課程，加強教師培訓。