【Emily】售在囚者出品 有迷你路標匙扣 懲教周六賣物會 主題弘揚中華文化

【明報專訊】懲教署體育會本周六（11月4日）喺赤柱監獄側足球場舉行第68屆秋季賣物會，出售在囚者製作嘅產品，包括家俬、木製擺設、文具、籐器、盆栽和手工藝品。Emily登入宣傳網站睇過啲銷售品，有啲設計都幾有趣，例如有用懲教署人員制服樣本做嘅Q版環保袋、護照套等。在囚者會幫手製造路牌，而今次咁啱亦有迷你路標鎖匙扣售賣。

以懲教制服樣本製環保袋

賣物會都有主題設定，話今年以弘揚中華文化為題，會場佈置、攤位設計及部分由在囚者製作嘅手工藝品，會注入中華文化元素，仲話「歡迎市民穿著華服出席」。會場內將設「弘揚中華文化體驗區」，區內設有「中國傳統運動區」，畀市民體驗投壺、木射和扯鈴等中國傳統運動；體驗區並設「中國文化遊戲區」、「民間手藝工作坊」及「中國民間工藝區」等，參加者可以玩猜燈謎及十二生肖排排坐等遊戲，及體驗活字印刷、剪紙製作及面部彩繪等傳統手工藝。

懲教署話，秋季賣物會自1953年起計，今年已經係第68屆，賣物會所籌得款項喺扣除支出後，將捐助志願機構，而賣物會亦提供機會畀在囚者回饋社會。活動喺上午10時45分至下午5時於赤柱東頭灣道99號側足球場舉行。市民可以乘搭巴士、小巴等到場。