【Emily】名額4000 二期共創明Teen收申請

【明報專訊】特首李家超喺《施政報告》宣布推行第二期「共創明『Teen』計劃」。政府噚日公布詳情及即日起收申請。新一期計劃擴展涵蓋弱勢社群家庭嘅中四學生，學員名額會由2800個增至4000個；同時會為完成計劃嘅學員設立「校友會」，提供兩年社交同工作實習機會。合資格嘅中一至中四學生可以喺11月16日前經所屬學校或相關社福機構報名。

呢期計劃亦會增加團體活動種類，例如舉辦更多內地學習交流團，仲會引入師友配對組群，即係幾組學員及友師可以安排一齊參加活動，加強互動交流。呢項計劃由政務司長陳國基領導嘅跨部門行動小組制定同推行，每個學員會獲配對一名義務友師，友師會向學員分享人生經驗、幫助學員增强自信等。友師同時會協助學員培養正確理財觀念，指導佢哋有效使用計劃提供嘅5000元啓動資金。學員完成計劃後另會獲發5000元獎學金，畀佢哋應用喺計劃期間學識嘅理財觀念。