【Emily】「引市民意見」讚施政報告 梁熙：倘現選特首 李家超定連任

【明報專訊】立法會噚日舉行《2023年施政報告》答問會，多名議員都讚報告內容，其中民建聯梁熙話落區時公眾反應正面，引述有市民話「如果今日係選特首嘅時候，一定係李家超特首能夠連任，無人能夠揮得低佢」。李家超就多番感謝議員喺諮詢期內提出意見。

答問會 李話採納咗大量議員意見

李家超前日發表任內第二份《施政報告》，噚日到立法會出席答問會。佢話今次施政報告採納咗大量議員意見，多次指自己有留意議員喺議會內外嘅言論。其中佢回應民建聯林琳嘅質詢時，就話一直留意林琳發布嘅短片同受訪內容，更稱「呢個行政長官都好勤力留意各位議員嘅不同意見」。

梁熙則引述市民盛讚各項政策慎密同長遠，指有市民講如果?家選特首，李家超一定連任咁話。李家超回應時就答謝市民支持，並感謝問責團隊同一眾常秘，充分參與施政報告嘅討論、盡心盡力投入相關工作。不過，李家超一度忘記提及3名副司長，到回應下一名議員提問時，先特別補充3人「揹好多嘢」。