【Emily】高球賽下月重臨 「觀眾村」頭兩日免費開放

【明報專訊】政府今年9月收番粉嶺高球場「舊場」後，下月會將場地借番畀香港哥爾夫球會舉辦闊別4年嘅「香港高爾夫球公開賽」。11月9日至12日嘅賽事，除咗會有本地「一哥」許龍一、去年英國公開賽冠軍史密夫（Cameron Smith）等多名國際級球手參賽外，入場者仲可以免費參加同場「觀眾村」一系列活動，包括戶外瑜伽、高爾夫模擬器同粉嶺球場生態遊等。

有生態遊兒童區美酒佳餚

入場者可以喺活動期間，每日早上10時至下午4時即場報名參加20分鐘嘅「歷史生態遊」，了解粉嶺球場嘅生態同歷史建築。「觀眾村」另設有「兒童專區」，小朋友可以玩跳彈牀、參加藝術工作坊等。「觀眾村」提供美酒佳餚，場內市民可以喺秋涼嘅戶外環境下「chill一chill」。

賽事同埋「觀眾村」將會喺頭兩日免費開放畀公眾入場，之後兩日、即周六同周日嘅單日門票費用為200元，4天入場證300元，18歲以下觀眾可於持票成人陪同或出示身分證下免費入場。大會亦為自駕者提供免費泊車位，同時有免費穿梭巴士來往上水港鐵站、九龍塘港鐵站、中環IFC同埋粉嶺球會。