【Emily】避風塘缺泊位 謝偉俊鬧官員唔面對

【明報專訊】避風塘泊位安排一向備受爭議。立法會研究避風塘及避風碇泊處相關事宜小組委員會噚日開會，多名業界人士親身出席投訴泊位嚴重不足，多名議員贊同促請政府盡快處理。選委會界別嘅謝偉俊喺會上批評官員「太多嘢未有面對及處理」，建議當局善用海邊資源「做嘢」。運輸及物流局副局長廖振新就話已經聽到議員嘅意見。

業界：傾咗多年 政府仍話夠

多個業界都有出席會議。香港漁民團體聯會主席張少強話，已經同政府商討泊位不足問題多年，但當局仍然堅稱足夠。佢話部分船泊設施分佈喺喜靈洲等地方，配套嚴重不足，而且?家避風塘泊位以「先到先得」分配，擔心會引起爭執。

太白海鮮舫有限公司代表張女士就話籌備緊復業，希望日後可達至珍寶海鮮舫嘅效果，推廣本港旅遊。佢期望當局可以喺計算交通航道流通時，顧及旅遊因素。

謝偉俊批評官員回應時「太多嘢無面對及處理」，建議當局「畀個心落去」。佢又話理解官員發言唔可以離開講稿內容，但應該針對問題核心。廖振新就回應話已經聽到大家意見，會整理意見，下次開會再跟進。