【Emily】重陽節 官員悼二戰英烈

【明報專訊】噚日重陽節，政府喺香港大會堂紀念花園舉行儀式，悼念二戰期間為保衛香港捐軀嘅人，特首李家超率領一眾官員，同埋終審法院首席法官張舉能、行會召集人葉劉淑儀、立法會主席梁君彥等，為喺二戰犧牲嘅英烈獻上花圈。

公務員事務局長楊何蓓茵噚日亦去咗和合石浩園，代表政府悼念因公殉職嘅政府人員。佢話葬喺浩園嘅76名殉職人員克盡己任為市民服務，執行職務時無私奉獻同付出，永遠係值得學習嘅楷模。另外，佢亦去咗景仰園向馬尼拉人質事件嘅死難者獻花。