【Emily】美酒佳餚巡禮周四開鑼

【明報專訊】闊別5年，「美酒佳餚巡禮」將喺今個星期四起一連4日（26日至29日）再次喺中環海濱舉行，入場費會因應日子、時段而唔同，分別係20元同埋40元。除咗要買入場券，記得要買埋品味通行證或智能卡，先至可以用當中嘅品味券兌換美酒、美食。品味通行證需要喺手機應用程式「美酒佳餚巡禮——品味通行證」購買；智能卡就要到活動網站、本地旅遊平台或即場購票後換取。

大會按照美酒佳餚種類、來源地，將300個美酒、美食攤位分成唔同區域，包括手工啤酒、氣泡及鷄尾酒等。今年仲有新設嘅「品味學堂」提供16場工作坊，參加者喺活動網站另外購票後，到時可以即場跟大廚學整龍蝦炒牛奶、鳳梨酥等。

為咗配合「哈囉威香港」活動，持有品味證嘅賓客喺星期五至星期日，穿著玩味十足、有創意嘅萬聖節主題服飾參與美酒佳餚巡禮，可以喺詢問處免費獲得兩張品味券，每日名額300個。

活動喺中環海濱舉行，入口喺中環10號碼頭旁。詳情可以瀏覽旅發局網頁裏面嘅「最新焦點」。