【Emily】連遇的士拒載 江玉歡批執法不力

【明報專訊】政府提出修例檢討的士服務，噚日立法會議員江玉歡同田北辰，不約而同喺社交媒體話應該檢討規管的士服務。其中江玉歡話，周日喺尖沙嘴街頭截的士，有兩部經過，但打開咗門，司機問完目的地之後，就用藉口公然拒載。佢又話黃昏時分去到佐敦一帶，街道兩旁有好多冚旗嘅的士等候網約單。佢質疑?家多咗遊客，但反而少咗的士。

江玉歡提出連串問題，問政府有無喺遊客增多後加強對違規的士司機嘅執法？佢又問，?家政府提出嘅的士扣分制，係咪有效解決到問題，「現有的法例不執行，卻在其上再加扣分制只是架屋疊牀」。

田北辰聞老司機車禍亡傷心

田北辰就一向關注司機年齡問題，話前日西貢發生一宗的士撞車起火事故，受重傷嘅78歲司機噚日不治，「聽到我都好傷心」。佢唔滿意政府一直唔肯就的士司機年齡設上限，話司機年齡問題一定要正視，認為意外一宗都嫌多，而政府計劃推出優質的士，佢認為屆時政府應該亦要規管司機嘅最高工時。