【Emily】李慧詩鼓勵炒車選手明年再戰 盼更多「單車友好」道路助練兵

【明報專訊】香港單車節前日舉行，今年中宣布退役嘅「牛下女車神」李慧詩（Sarah）亦有參加50公里組項目，仲參加埋「環粵港澳大灣區城市自行車挑戰賽公路組」。當日大灣區賽事多名選手炒車，Sarah噚日就喺facebook報平安，又話單車比賽有車手擦傷，同馬拉松比賽有選手抽筋一樣常見。對於傳媒焦點集中喺單車節意外，而非國際賽同50公里賽事上，佢話感到無奈同遺憾。

曾經喺唔同國際賽事經歷高低起跌嘅Sarah鼓勵單車手：「今年摔了，無論是什麼原因，都希望大家慢慢放下，積極恢復訓練，明年再來挑戰！」她又希望單車節後，香港會有更多比賽同單車友好道路開放，畀單車手練練兵。

灣區賽 對自己表現唔滿意

李慧詩形容喺50公里組項目騎行三隧三橋係一趟神奇之旅，要停嘅燈唔使停，唔准拐嘅路都能拐，無左上右下之分，跟住大會指示，騎要騎嘅路。至於女子繞圈賽（即大灣區賽事），佢話原先目標係前八，但最後因為上坡時錯判而引起肌肉反應，最終終點前無勁衝，對自己表現有啲唔滿意，希望下次做得更好。