【Emily】難忘救火12小時 山火隊籲掃墓小心

【明報專訊】香港每年10月至下一年4月都係山火頻繁季節，喺呢段時間，漁護署嘅技工、工人同農林助理員會組成山火隊，全天候駐守郊野公園管理站，又會四出巡邏及接收市民嘅山火報告，喺有需要時出動滅火。入職超過7年嘅農林助理員羅子龍就有一個難忘嘅救火12小時經歷。

「樹木生到人咁高需十年」

駐守大欖郊野公園荃錦管理站嘅羅子龍話，當時佢同隊員帶住工具同糧食上山，不停穿山過嶺同山火搏鬥，「山火唔係想像咁簡單，可能會燒到5、6呎高，令人無法行近。我哋有時係以防守方式阻止山火蔓延」。

守護郊野公園30幾年嘅高級農林助理員張榮強就話，救熄一場山火好有滿足感，但火後往往滿目瘡痍，「令人神傷，好多樹木要等八年十年先再生到人咁高」。

適逢重陽節期間，漁農署呼籲市民郊遊同掃墓時小心處理火種，確保離開前所有火種完全熄滅。根據《林區及郊區條例》，喺郊區留低火種或隨意燃燒冥鏹，一經定罪最高可判罰款2.5萬元同監禁1年。