【Emily】法官鄧國楨勉同行「唔一定局限香港」

【明報專訊】外界經常將香港同新加坡相提並論，包括兩地喺區內法律樞紐同仲裁中心嘅角色。終審法院非常任法官鄧國楨（圖）勉勵法律界同行，話香港律師都唔一定局限喺香港工作，例如可以去新加坡或其他仲裁中心試吓。鄧官又話，內地有識之士都清楚，內地仍需要嚟自香港有經驗同獨立嘅律師。

話港法律人才難取代

鄧官噚日喺香港仲裁周同香港法律界步行日活動話，香港作為法律樞紐，最難取代就係法律人才，加上全球頂尖律師行都喺香港設分行，只要繼續壯大法律界，香港地位得以保持。

講到同終院海外非常任法官共事，鄧官話非常任法官都好勤力，睇晒全部文件，其中華學佳（Lord Robert Walker）連相關判辭嘅註腳同引述案例都睇晒。

轉任非常任法官後嘅鄧官現時擔任仲裁員，佢笑言以往夾時間、回覆來函等都有事務律師或聆案官幫手，?家就要親力親為，30幾年都未試過。對比仲裁同上庭，佢話兩者唔相同，法庭比較多唇槍舌劍，仲裁比較清楚、比較少意外結果，壓力亦相對無咁大。