【Emily】民調指八成倡增建 林筱魯倡推「儲款預購資助屋」

【明報專訊】房屋問題係今屆政府重中之重，本身係規劃師嘅立法會房屋事務委員會委員林筱魯，喺8月至9月做問卷調查，了解中層及基層市民、尤其係青年對住房及置業嘅關注點。調查主要針對受訪者嘅居住環境、負擔能力、住屋及置業訴求等，收回508份問卷，近40%受訪者住喺「不適切居所」，近60%人均居住面積低於76平方呎嘅標準，反映居住環境擠迫，而市民對置業嘅需求仍然殷切。

調查結果發現，逾半受訪者有申請公屋，當中85.4%仍未獲編配上樓。另外逾80%受訪者支持政府興建更多資助自置房屋，當中逾40%以居屋為目標，另各約20%傾向買私樓及綠置居。

林筱魯建議政府重新審視房策，檢視中長期公屋及資助出售房屋嘅比例。佢同時建議政府延長按揭貸款期及提供擔保等手段，協助市民喺可負擔嘅供款水平上置業，並應該積極考慮推出「儲錢換地花」，透過「儲款預購資助出售房屋」機制，增加市民置業向上流嘅機會。