【Emily】賀亞運港將佳績 馬場周日免費入

【明報專訊】香港賽馬會話見到香港運動員喺杭州亞運表現出色，為咗表達支持，噚日宣布嚟緊周日（22日）將會喺沙田馬場舉辦「中國香港亞運獎牌運動員賽馬日」，同時免費開放馬場嘅公眾席，朝早10時半起可以入場。

多場賽事以奪金項目命名

馬會提醒大家，當日有兩場重點賽事要留意，包括第五場嘅「中國香港亞運獎牌運動員盃」同第七場嘅「精英碗」。其餘賽事大部分就會用港隊喺亞運獲得金牌嘅項目命名，包括橋牌、單車、劍擊、高爾夫球、賽艇、七人欖球、游泳，最後一項係馬術運動。

同場仲會舉行「賽馬會優秀運動員獎勵計劃」支票頒授儀式，獎勵喺7個頂尖大型運動會中勇奪金、銀、銅牌嘅運動員，包括奧運、殘奧運、亞運、亞殘運、全運會、全國殘運會、世界大學生運動會；喺奧運同殘奧奪得第四至第八名嘅運動員都會獲頒獎金鼓勵。