【Emily】立會辯創科 聞尚海龍發言諗起小鳳姐 龍漢標唱《順流逆流》促撤辣

【明報專訊】立法會噚日通過由選委界議員尚海龍提出嘅「跟進國家主席習近平2022年6月30日的重要創新科技指示」無約束力議案。議案驟眼睇嚟同樓市風馬牛不相及，但經民聯地產及建造界議員龍漢標就趁機促請政府「撤辣」，吸引創科人才來港。佢雖然無份演出「立會好聲音」，但都忍唔住即場高歌徐小鳳金曲《順流逆流》，話撤辣已經成為社會主流意見，叫政府「將辣招馬上送入歷史嘅堆填區」。

自嘲「非立會好聲音材料」

龍漢標發言時話自己唔係從事創科，本身唔打算就議案發表意見，不過尚海龍之前發言提到要解決來港人才嘅居住、醫療等問題，仲關注新一份《施政報告》會唔會豁免外地人才買樓嘅額外印花稅，於是發言和應尚海龍；龍漢標話，聽到呢一度，佢個腦不期然浮現咗小鳳姐嘅倩影。

龍漢標即席唱出徐小鳳金曲《順流逆流》其中幾句：「幾多艱苦當天我默默接受，幾多辛酸也未放手；故意挑剔今天我不在乎，只跟心中意願去走。」佢嘅歌藝如何大家心中有數，連佢自己都自嘲「唔係立會好聲音嘅材料」。

龍漢標話舊年解釋點解爭取撤辣時係「孤身走我路」，時至今日已經成為主流意見，促請政府「將辣招馬上送入歷史嘅堆填區」。