【Emily】膺護專榮譽院士 陳肇始：與抗疫護士共享

【明報專訊】香港護理專科學院聽日（21日）舉行院士頒授典禮，前食物及衛生局長、港大護理學院教授陳肇始今年同6人獲頒授榮譽院士，以表揚佢哋對香港高級護理發展嘅支持，同埋對護理專業嘅貢獻及領導。陳肇始同Emily講，會以謙卑嘅心接受呢項殊榮，亦非常感激身邊好多人堅定不移嘅支持，希望將呢份榮譽同所有參與抗疫嘅護士分享。

護專喺2012年成立，致力制定護士專科資格評核基準同考試制度，每年會向對香港護理專業發展有重大貢獻嘅人頒發榮譽院士，醫管局前主席梁智鴻、胡定旭、梁智仁，同埋前衛福局長楊永強、前食衛局長周一嶽及高永文都曾獲頒榮譽院士。

許鞍華獲頒浸大榮譽博士

另外，浸大將向3人頒授榮譽博士學位，以表揚佢哋出眾嘅專業成就及對社會嘅卓越貢獻，包括向著名導演許鞍華頒發榮譽文學博士，向北京大學生命科學學院前院長饒毅頒授榮譽理學博士，同埋向吳文政王月娥基金會創辦人吳南燕頒授榮譽人文學博士。