【Emily】暴雨冇用緊急警示 鄧炳強解畫

【明報專訊】政府2020年耗資1.5億元設立「緊急警示系統」，至今只有喺新冠疫情期間啟動過一次，「震動」大家嘅手機。早排香港經歷500年一遇嘅大暴雨同10號風球，唔少人關注點解政府唔動用緊急警示系統，保安局長鄧炳強噚日回覆立法會議員陸瀚民嘅書面質詢時，解釋緊急警示系統嘅發放安排同程序，指緊急警示分為兩級，係「緊急」同「極度緊急」，發出前須由政策局長或政務司長批准。

警示分兩級 地震恐襲「極緊急」

保安局話，「緊急警示」適用於可能危及廣泛人命財產安全嘅緊急信息，例如大型颱風導致廣泛基建破壞等，「極度緊急警示」則處理極端緊急、要即時通知市民以保障人命財產安全嘅情况，例如嚴重地震、海嘯、恐襲等。

當局喺上月發生500年一遇暴雨及水浸時，首次發出「極端情况」公布，但都無使用「緊急警示系統」。保安局話「極端情况」公布後，當時已成立嘅荃灣同南區「關愛隊」分別派出約120名關愛隊成員同約170名義工，協助喺臨時庇護中心當值同跟進各善後工作；政府亦喺「極端情况」結束後先後3次啟動「全政府動員」機制，動員13個局同部門約510名公務人員，協助喺全港多區清理路面、家居、校舍等。