【Emily】尚海龍開會敲鑼 賀攞到動議「頭啖湯」 被梁君彥嗌停 話唔驚違議規

【明報專訊】立法會噚日辯論由選委界別議員尚海龍提出、關於推動本港創科發展嘅無約束力議案。佢動議發言時，突然攞咗一個鑼出嚟，仲即場敲鑼，話「好榮幸攞到頭啖湯」，成為休會後首個辯論嘅議員議案。立法會主席梁君彥即場制止，警告佢唔應該打鑼。尚海龍會後解釋，「開鑼係一種創新」，亦切合今次為「開鑼議案」，唔擔心違反《議事規則》。

尚海龍噚日動議「跟進國家主席習近平2022年6月30日的重要創新科技指示」無約束力議員議案，發言時突然打鑼，被主席制止。唔少議員私下質疑喺會議廳打鑼唔理想，尚海龍會後回應話尊重梁君彥裁決，至於觀感就「見仁見智」，會尊重其他人意見。

提推動創科 「開鑼寓意創新」

尚海龍話，前晚出席一個晚宴活動有舞獅環節，覺得充滿生氣，啟發佢噚日發言時打鑼，所以特登向龍獅隊借鑼。被問到擔唔擔心違反議事規則，佢話道具只要與辯論有關就符合規則，而今次係立法會復會後首個「開鑼議案」，開鑼都寓意創新精神。