【Emily】中大60周年 段崇智會民建聯代表團 同查逸超排排坐 傾大學發展

【明報專訊】前日（17日）係中文大學創校60周年紀念日，咁重要嘅日子校方接待咗一眾貴賓。校長段崇智噚日喺校方刊物《走進中大》提到，當日非常榮幸可以喺中大校園接待民建聯代表團，雙方交流對大學發展嘅諗法。睇合照見到唔少民記元老出席，包括創黨主席曾鈺成、前主席譚耀宗、副主席陳勇，而陳婉嫻就以前常委身分同枱；仲有監委會主席盧文端及港區全國人代黃冰芬。

曾鈺成譚耀宗等元老出席

段崇智話，呢個係難得嘅機會，畀中大同各代表團成員討論校方對國家發展嘅貢獻。校方亦安排「大豆專家」、中大農業生物技術國家重點實驗室主任林漢明，同民建聯代表深入討論大豆研究項目。

中大校董會改革早前引發紛爭，校董會主席查逸超更遭「架空」。睇番中大嘅相片，查逸超同段崇智並排而坐，向來賓講解中大發展，而校方亦安排副校長（策略發展）陳偉儀、副校長（行政）吳樹培、協理副校長（校外聯繫及推廣）金江等代表接待民記成員。

另外，段崇智提到，中大於創校紀念日舉行特別升國旗儀式，喺呢個極具歷史意義嘅重大日子同中大人同慶鑽禧，「回味中大一甲子嘅輝煌成就，展望未來點樣進一步貢獻社會及國家」。