【Emily】謝展寰推廣綠色殯葬 「點解執著搵地方擺骨灰」

【明報專訊】環境及生態局長謝展寰噚日出席綠色殯葬推廣啟動禮，話綠色殯葬理念係死後回歸大自然，普及程度過去10年顯著上升，由2013年3400宗增至舊年9400宗。佢憶述細個嗰陣香港仍以土葬為主，見到好多長輩離世後要搵地方埋葬好麻煩，而近年火葬已成主流，反問「既然火葬都覺得得喇，咁淨番嗰啲（骨）灰，點解我哋咁執著一定要搵一個地方去擺，然後搞到有時好複雜好困難呢？」佢呼籲市民以正面態度預先規劃人生「最後一里路」。

管制即棄膠餐具延至明年第二季

另外，管制即棄膠餐具嘅《2023年產品環保責任（修訂）條例草案》今日喺立法會恢復二讀，謝展寰話由於立法會之前審議條例「用咗啲時間討論」執行細節、涵蓋物品範圍，相信要下年第二季先實施第一階段管制，較政府目標今年底至明年初實施慢，但仍較原定2025年提早超過一年。