【Emily】田北辰倡設年長司機「最高工時」

【明報專訊】立法會噚日開法案委員會審理兩條條例草案，處理的士司機違例記分、優質車隊。之前發生年長的士司機意外，實政圓桌議員田北辰話，想借法案會「最後機會」，要求政府處理的士司機年齡老化問題。佢話政府?家提出做優質的士車隊，「你話優質，如果我坐架的士，司機係90歲嘅，咁我都覺得有啲啲奇怪！」本身係長者嘅田二少話唔係歧視超齡長者，但現時理論上100歲嘅人都可以揸的士，形容係「貽笑大方」。

政府之前已表明暫無意就商用車司機年齡設立限制，出席會議嘅副運輸及物流局長麥震宇話，政府已經就司機年齡方面開展諮詢工作，初步建議要求年長司機做嘅體格證明書，要做得更詳盡；駕駛商用車嘅司機，更要年紀後生啲就已經要提交體格證明書。

不過，田二少仍然話就算唔限年齡，都要諗吓係咪要為年長司機設「最高工時」，同埋諗吓點執法，話有啲地方例如美國紐約都有相關要求。田二少不滿咁話，如果政府咩都唔諗，咁開法案委員會仲有咩意義？