【Emily】29號有月偏食 凌晨朝西可觀賞

【明報專訊】市民本月29日凌晨可以喺本港上空睇到月偏食。天文台話，今次月食期間月亮嘅仰角較低，如果天氣情况良好，市民憑肉眼就可以直接觀賞月食過程，又提醒大家面向西方、冇障礙物嘅地點都適合睇月食。

天文台話，10月29日凌晨1點59分就開始「半影食始」，凌晨3點35分「初虧」，即係月球同本影接觸，呢個時候就會開始月偏食；去到凌晨4點14分「食甚」，然後喺4點54分「復圓」，結束偏食。今次月偏食嘅食分只有約0.13，代表「食甚」時，月球有13%左右嘅直徑進入地球本影。

設網上直播 後年先有月全食

天文台話，到時可透過天文台、香港太空館、嗇色園主辦可觀自然教育中心暨天文館等聯合網上直播，觀賞月食過程。睇番天文台紀錄，對上一次香港可觀測嘅月食係上年11月8日出現嘅「月全食」，下次就要等到2025年9月7日嘅「月全食」。