【Emily】107新當然選委 許家印不再「當然」

【明報專訊】候選人資格審查委員會噚日刊憲公布，選委會共有107名新任當然選委獲有效登記，包括一眾新任港區人代及全國政協委員；至於前日涉嫌違法犯罪被採取強制措施嘅中國恒大董事會主席許家印，就因為已經卸任政協，按規定亦失去當然選委席位。

政府噚日公布107名獲有效登記新任當然選委嘅名單，自2008年出任政協委員，並曾任政協常委嘅許家印，原以全國政協身分成為當然選委，但因為佢已經卸任，所以唔再係選委。另一邊廂，多個新任全國政協登記為當然選委，包括影星甄子丹、歌唱家莫華倫、香港聖公會教省主教長陳謳明、前民政事務局長劉江華、警務處前副處長劉業成等。

城大校長席位由校董會主席擔任

至於其他界別，教育界屬於城大校長嘅當然選委席位，因為新加坡出世嘅新任校長梅彥昌未有登記做選委，於是由校董會主席黃嘉純擔任。建測規園界方面，建築師學會會長陳澤斌同測量師學會會長黃國良分別成為當然選委。另外，4個去年循選委會界別補選當選嘅立法會議員黃錦輝、尚海龍、民建聯陳永光、新民黨何敬康，仲有原本係商界（第三）選委嘅選委界議員譚岳衡，亦登記為當然選委。