【明報專訊】明日中秋節，一眾議員節日前夕紛紛落區，其中被指較少參與立法會事務嘅選委界別議員林順潮，亦聯同觀塘區議會主席柯創盛一齊落區，到鯉魚門向長者派發月餅同平安米。雖然新冠疫情告一段落，林順潮亦繼續派發快測包，話希望畀長者「看門口」。
林順潮喺政府法案表決時出席率低，今年亦僅加入咗衛生事務委員會，佢早前回應話會不斷努力改進，樂意接受媒體監督。Emily睇番林順潮facebook，佢過去甚少發布落區嘅相片，不過噚日就趁中秋前夕去鯉魚門向長者派嘢，並與街坊合照，佢話希望為長者送上歡樂同溫暖，派發快測包希望保障長者健康。佢提到國慶同樣臨近，祝願祖國繁榮昌盛。
