【Emily】運署推網上申國際駕照 10工作天到手

【明報專訊】近年唔少人都鍾意自駕遊，以往要申請國際車牌，只可以親身到長期大排長龍嘅運輸署牌照事務處辦手續，或者郵寄申請。運輸署噚日宣布，即日可經香港政府一站通網站網上申領國際駕駛許可證，如果交齊文件同相片，一般10個工作天內可以經郵遞掛號方式收證。

要智方便+或數碼證書 掛號收證

運輸署話，經網上辦理嘅國際駕駛許可證，個人資料嘅部分會係一整張貼紙，版面同?家經親身或者郵寄申請嘅有啲唔同，但兩者同樣有效，會有運輸署蓋章。Emily噚日都試下喺網上申請國際車牌，進入網站後，需要先用有數碼簽署功能嘅「智方便+」帳戶或者個人數碼證書認證身分，之後填表、上傳個人近照同地址證明，最後經信用卡或者「轉數快」交申請費80元，就會收到確認通知書。

網上申請雖然方便，但都要10個工作天先有證到手，時間同郵寄申請一樣，如果大家急住出發想即日收證，就要親身辦理喇。運輸署建議市民申請國際車牌要預留充足時間，又提醒如果想親身到事務處櫃位辦手續，可以預先上網或打電話3763 8080預約。