【Emily】亞運港棋手遺失手機 義工搜萬袋垃圾尋回

【明報專訊】杭州亞運大會噚日喺facebook發布一則場外小插曲，原來係香港隊12歲國際象棋選手劉天儀喺上周六（23日）晚開幕禮前唔見咗部手機，大會義工團當晚隨即動員搜尋數萬袋垃圾，最終喺24小時內搵番。中國香港代表團團長霍啟剛喺微博上載短片，向義工團致敬及表達衷心感謝。

霍啟剛喺短片講述事件來龍去脈，提到有個香港運動員（無講名）出席亞運開幕禮前，同其他隊伍喺杭州奧體中心網球中心休息及等待入場時，可能唔小心將手機誤放入晚餐嘅紙袋，之後唔記得拎走。最終港協暨奧委會通知當地組委會，霍啟剛話估唔到大會義工團當晚隨即動員，喺佔地52.3萬平方米嘅場地，逐包搜尋數萬袋垃圾，結果搵到手機物歸原主。

霍啟剛話對此感動、非常開心同欣慰，作為團長「向大家致敬」，代表香港900多名運動員，感謝杭州亞運所有營運團隊及義工嘅付出同熱情，「我們在這裏住得很開心、比賽比得很開心，也祝願杭州亞運會順利圓滿成功」。

按亞運會官網資料，劉天儀過去3日完成國際象棋女子個人賽7輪賽事，今日出戰第八輪。