【Emily】訪粵考察科技 何永賢睇起屋 林世雄睇泊車

【明報專訊】應用創新建築技術加快建屋進度，可謂本屆政府落實建屋「提量、提速、提效、提質」4個方向嘅重要一環。房屋局長何永賢上周二到訪中海海創智造科技（珠海）有限公司，參觀佢哋嘅數字展廳同生產線，聽取機電裝備合成法（「MiMEP」）模組嘅生產流程、點樣透過機械人自動化及高效地生產機電裝備成品，包括參觀機械臂處理機電裝備成品情况。

何永賢噚日喺社交專頁發文話，「MiMEP」將人手密集工序遷移至工廠，透過組裝合成法，將多個不同行業嘅機電裝置，喺工廠環境下組裝成單元模塊，運送到工地後再同其他模塊連接，更快捷有效地完成多個屋宇裝備嘅安裝。何永賢話，工廠工人只有10個以內，地方井井有條又清潔。

運輸及物流局長林世雄上周都去過廣州，並考察交通管理，睇咗一個智慧型管理嘅大型停車庫，了解「立體型」自動泊車系統運作，該系統以三維移動方式存取車輛；容許駕駛者毋須掉頭或倒車，又減少駕駛者排隊等候時間。