【Emily】馬會支援亞運馬術賽 李家超：高興港作貢獻

【明報專訊】杭州亞運今日（26日）會舉行馬術項目賽事，特首李家超噚日到訪亞運會馬術場館桐廬馬術中心，同香港嘅義工交流，並為代表香港出賽嘅馬會馬術隊成員加油打氣。李家超話，佢同香港市民都因為香港運動員喺亞運會有出色表現而感到驕傲；港府會繼續循普及化、精英化、盛事化、專業化同產業化五方面，推動香港嘅體育發展，同時為國家籌辦大型體育盛事作出貢獻。

李家超噚日同馬會主席利子厚、馬會行政總裁應家柏，以及馬術專家、技術人員等，參觀馬術中心嘅設施、了解馬術賽事籌備工作等。今屆亞運馬會馬術隊9名成員出戰盛裝舞步、三項賽同埋場地障礙賽，係馬術隊第一次喺3個項目同時出戰個人同團體賽事。

馬會早前同杭州亞運會組委會簽署合作備忘錄，為馬術項目提供馬嘅運輸同馬房管理等技術支援。馬會同時會為馬術項目管理指揮中心工作人員、杭州亞運會香港義工提供培訓。李家超話好高興香港能為杭州亞運會作出貢獻。